Thursday, May 26, 2005

 

Marathon(hindi mein)

aao bachchon tumhen sunayen ek kahani,
mat poocho, ye gatha humne kaise jaani,
kitne-kitne kasht sahe hain iski khatir,
chodi humne neend ke choda khana-paani!

ek saheb the, bade josh mein vo rahate the,
kuch bhi kar sakta hoon duniya mein, kahate the,
sabko tha maloom, hai kitna hosh, josh mein,
jaan ke jwala aur bhi bhadkaate rahate the!

naya-naya ji unko phir ek shauk chadha tha,
dum na ratti bhar ka, lekin khwab bada tha,
kitna samjhaya sabne, ab bhi ruk jaao,
lekin akal pe patthar nahin pahad pada tha!

Marathon dauden, unki ichha ho aayee,
bole sab, lo uski to ab shaamat aayee,
samjhaye koi, pahale seedhe to chal len,
unke purkhon ne bhi hai kya daud lagai!

na ban paati kahavaten jo maan vo jaata,
kahane se kumhaar gadhe pe chadh na jaata?
naach na paate to, tedha na aangan hota,
bhor ka bhoola, saanjh dhale ghar aa na paata!

phir unki aukaat kisi ne jab dikhlayee,
jaise-taise baat unhen phir samajh mein aayee,
ghabraye phir taanon se duniya ke kyonki,
bol chuke the 'pran jayee par bachan na jayee!

jab unko haalaat samajh mein aaye asli,
gayee shaan gaddhe mein, aur hui haalat patli,
koshish karte the chalne ki taan ke seena,
lekin lagata tha ke nikli bas ab nikli!

aakhir vo phir sah na paaye bhaar ye bhari,
utri sar se phir hoke laachaar khumari,
Marathon vaale din ghar se nikal na paaye,
kyonki shauchalaya mein saari raat guzari!

utar gayee saari izzat aur hui burai,
pakade donon kaan, baat ye samajh mein aayee,
kaha loki kaviraay, ki bolo soch sahajh kar,
varna pachtaoge, hogi jagat hansai!

Comments:
You just keep outdoing yourself, dont you??
Amazing, man!! This one ought to be in the school text books... :-))
maine pehle bhi kaha hain, aur fir kahunga-- tu likhte reh.
 
FUNDOO MAN!!!!
assy is ryt.
but seems yeh kissa Akki da par fit baithta hai but woh to US mein hain.
anyway, nice one buddy.
wen coming to delhi?
 
Too good.
'na ban paati kahaavaten jo maan vo jaata' Wah!

Waise marathon ke pehale likhi hogi tumne yeh kavita. Apne aap ko ek tarah ka 'do-or-die' motivation dene ke liye, hai na?
 
tu kuchh naya likhe to main comments bhi doon. par tu mauqa hi nahin deta
 
abey loki, marathon ki news purani ho gayi....naya post likh.
 
Post a Comment

<< Home

This page is powered by Blogger. Isn't yours?